काठमाडौँ — अध्यागमन विभागले अबदेखि पदयात्रा अनुमति (Trekking Permit) सम्पूर्ण रूपमा अनलाइन प्रणालीमार्फत प्रदान गर्ने भएको छ। विभागले अनलाइन सेवा प्रारम्भिक चरणमै प्रभावकारी रूपमा कार्यान्वयन गर्ने उद्देश्यका साथ यस प्रणालीलाई पूर्ण रूपमा लागू गर्ने तयारी गरेको हो।
विभागले जानकारी दिएको छ कि प्रारम्भिक चरणमा सेवाग्राही एजेन्सीहरूलाई हुने असुविधालाई ध्यानमा राख्दै केही समयका लागि प्रत्यक्ष सम्पर्कमार्फत सेवा प्रवाह गरिएको थियो। तर, सो क्रममा केही एजेन्सीका कर्मचारीहरू स्वयं विचौलियाको रूपमा कार्य गर्दै मोलमोलाइ तथा अवैध क्रियाकलापमा संलग्न भएको तथ्य फेला परेपछि विभागले अब यस्तो कार्यप्रणालीलाई पूर्ण रूपमा अन्त्य गर्ने निर्णय गरेको हो।
विभागका अनुसार अबदेखि सबै ट्रेकिङ एजेन्सीहरूले आफ्नै अनलाइन पोर्टलमार्फत पदयात्रा अनुमति आवेदन दर्ता गर्नुपर्नेछ। कुनै पनि कर्मचारी वा विचौलियामार्फत आवेदन पठाउन निषेध गरिएको छ। विभागले पारदर्शिता, उत्तरदायित्व र निष्पक्ष सेवाको वातावरण कायम राख्दै उत्कृष्ट सेवा प्रदान गर्ने प्रतिबद्धता जनाएको छ।
अनलाइन निवेदन पेश भएपछि एक कार्यदिनभित्र कारवाही हुने व्यवस्था गरिएको छ। दिउँसो ३ बजेपछि आएका निवेदनहरू भने अर्को कार्यदिन दिउँसो १ बजेसम्म क्रमशः कारवाही गरिनेछ। राजस्व भुक्तानी भएका आवेदनहरूको हकमा सोही समयमा सम्बन्धित एजेन्सीको पोर्टलमा अनुमति उपलब्ध गराइनेछ।
सेवाग्राहीहरूले समस्याको सामना गरेमा पोर्टलमा उल्लेखित मोबाइल नम्बर वा WhatsApp/Viber मार्फत सन्देश पठाउन सक्नेछन्। सार्वजनिक बिदा र कार्यालय समयबाहेक उद्धार (Rescue) सेवाबाहेक अन्य नियमित सेवाहरू उपलब्ध नहुने पनि विभागले स्पष्ट गरेको छ।
विभागले थप जनाएको छ कि यदि आवेदनमा आवश्यक कागजात नपुगेको वा अन्य कारणले अनुमति दिन नसकिने भएमा अनलाइन प्रणालीबाटै अस्वीकृत गरिनेछ। त्यसैले एजेन्सीहरूले सबै कागजात र शुल्कहरू पूरा गरी सावधानीपूर्वक आवेदन पेश गर्न आग्रह गरिएको छ।
