काठमाडौं । अघिल्ला सबै भिजिट भिसासम्बन्धी मापदण्ड र परिपत्रहरू खारेज गर्दै सरकारले नयाँ व्यवस्था लागू गरेको छ। गृह मन्त्रालयको मिति २०८२ असोज १३ गतेको मन्त्रीस्तरीय निर्णयअनुसार अध्यागमन विभागले अबदेखि भिजिट भिसामा विदेश जान चाहने नेपाली नागरिकका लागि सरल र स्पष्ट प्रक्रिया कार्यान्वयनमा ल्याएको हो।
नयाँ निर्णय अनुसार, अब नेपाली नागरिकले कम्तीमा ६ महिना वैधता भएको राहदानी, सम्बन्धित देशको प्रवेशाज्ञा (VISA) वा On Arrival VISA प्राप्त हुने देशका हकमा प्रवेशाज्ञा नचाहिने प्रमाण, गन्तव्यसम्मको हवाई टिकट, र भ्रमण प्रयोजनको स्वघोषणा पेस गरेपछि प्रस्थान अनुमति पाउनेछन्।
विभागका अनुसार विगतमा जारी मापदण्डले नागरिकहरूलाई अनावश्यक हैरानी र अनियमितताको जोखिममा पार्दै आएकोले, नयाँ प्रणालीले अध्यागमन प्रक्रियालाई पारदर्शी, सरल र नागरिकमैत्री बनाउने लक्ष्य लिएको हो।
अध्यागमन विभागले भिजिट भिसामा हुने अनियमितता नियन्त्रण गर्दै नागरिकको सुरक्षालाई प्राथमिकतामा राख्ने र अध्यागमन प्रशासनमा सुशासन तथा व्यावसायिकता प्रवर्द्धन गर्न यो कदम महत्वपूर्ण भएको जनाएको छ।
साथै, विभागले सबै नागरिकलाई कुनै पनि बिचौलियाको प्रभावमा नपरी आफ्नो यात्राको उद्देश्यबारे पूर्ण रूपमा सुसूचित भई निर्धक्क यात्रा गर्न अनुरोध गरेको छ।
