श्रम, रोजगार तथा सामाजिक सुरक्षा मन्त्रालयअन्तर्गत श्रम तथा व्यवसायजन्य सुरक्षा विभागले अबदेखि श्रम इजाजतसम्बन्धी विज्ञापन श्रम संसार पोर्टल वा श्रम संसार एपमार्फत अनिवार्य प्रकाशन गर्नुपर्ने व्यवस्था गरेको छ ।
श्रम ऐन, २०७४ को दफा २२ को उपदफा (३) तथा श्रम नियमावली, २०७५ को नियम ७ बमोजिम आवश्यक विवरण खुलाइ रोजगारदाताले श्रमिकको माग विज्ञापन दैनिक पत्रिकामा प्रकाशन गर्नुपर्ने प्रचलन रहेको छ । यसरी विज्ञापन गर्दा उक्त मागमा नेपाली नागरिकको आवेदन नपरे वा छनौट हुन नसके विदेशी नागरिकलाई काममा लगाउन रोजगारदाताले विभाग समक्ष निवेदन दिई विदेशी श्रमिक राख्न सक्ने व्यवस्था रहेकोमा अब ति विज्ञापन सरकारको श्रम संसार पोर्टल वा श्रम संसार एपमा पनि अनिवार्य समावेश गर्नुपर्ने भएको हो ।
नेपाल सरकारको ‘नागरिक एप’ सँग समेत श्रम संसार आवद्ध भईसकेको छ । विभागले रोजगारदाताहरुले श्रमिक माग विज्ञापनका लागि अब अनिवार्य रूपमा श्रम संसार पोर्टल र एप प्रयोग गर्नुपर्ने भन्दै सबै रोजगारदाता तथा सरोकारवालालाई उक्त व्यवस्था कार्यान्वयनमा सहयोग गर्न सूचित गरेको छ ।
