सरकारले नेपालमा विदेशी नागरिकको प्रवेश, बसाइ र गतिविधि व्यवस्थापनका लागि विकसित विदेशी नागरिक व्यवस्थापन सूचना प्रणाली (Foreign Nationals Management Information System) २०८२ पुष १७ (सन् २०२६ जनवरी १) देखि अनिवार्य रूपमा कार्यान्वयन गर्न लागेको छ।
अध्यागमन विभागका अनुसार, यो प्रणालीमार्फत् नेपाल प्रवेश गर्ने विदेशी नागरिकहरूको व्यवस्थित अभिलेख राख्न सकिनेछ, जसले आपतकालीन अवस्थामा खोज, उद्धार र सुरक्षा सुनिश्चित गर्न सहयोग पुग्नेछ। यसले सुरक्षा निकाय, पर्यटन व्यवसायी र अन्य सरोकारवाला निकायबीच सूचना आदानप्रदानलाई सरल र प्रभावकारी बनाउने विश्वास गरिएको छ।
पहिलो चरणमा काठमाडौं उपत्यकाका तारे होटलहरूमा प्रणाली अनिवार्य रूपमा लागू हुनेछ भने दोस्रो चरणमा मार्च १, २०२६ देखि देशभरिका सबै तारे होटल, विमान कम्पनी, टुर्स एण्ड ट्राभल्स कम्पनी, मनी एक्सचेञ्जर तथा अन्य सार्वजनिक र निजी संस्थाहरूमा विस्तार गरिनेछ।
विदेशी नागरिकलाई सेवा दिने सबै संस्था र कम्पनीहरूले यस प्रणालीमा अनिवार्य रूपमा दर्ता हुनुपर्ने छ। दर्ता प्रक्रिया र म्यानुअल सम्बन्धित विभागको वेबसाइट https://www.immigration.gov.np मा उपलब्ध छन्।
