मुस्ताङ जिल्लास्थित कोरला अध्यागमन कार्यालयबाट कार्तिक २१ गते देखि औपचारिक रूपमा सेवा प्रवाह सुरु गरिएको छ। कार्यालयको उद्घाटन भएको एक वर्षपछि पहिलोपटक १३ जना नेपाली नागरिक चीनतर्फ प्रस्थान गरेका हुन्। सो कार्यालयको उद्घाटन पूर्वगृहमन्त्री रमेश लेखकले २०८१ साल कार्तिक १४ गते गरेका थिए।
हाल कोरला क्षेत्रमा बाक्लो हिउँ परेका कारण अध्यागमन सेवा ल्होमान्थाङ इलाका प्रशासन कार्यालयबाट सञ्चालन गरिएको हो। ल्होमान्थाङ गाउँपालिकाका अध्यक्ष सहित १३ जनाको टोली आज कोरला हुँदै ल्हासा प्रस्थान गरेको हो। यस क्रममा चीनको अध्यागमन निकायले पनि पहिलोपटक कोरला नाकामार्फत साधारण राहदानीधारी नेपाली नागरिकलाई भिसा जारी गरेको छ।
यसअघि पटक–पटक प्रयास गरिए पनि कोरला नाकाबाट सेवा सञ्चालन हुन नसकेकोमा यो पहिलो सफल प्रयास हो।
नेपाल सरकारले माथिल्लो मुस्ताङलाई निषेधित क्षेत्रका रूपमा घोषणा गरेको कारण त्यहाँ प्रवेश गर्न वा पदयात्रा गर्न पहिलो १० दिनका लागि ५०० अमेरिकी डलर तिर्नुपर्ने व्यवस्था छ। सोही नियम चीनका नागरिकहरूमा पनि लागू हुन्छ, जसअन्तर्गत कोरला नाकामार्फत नेपाल प्रवेश गर्दा उनीहरूले पनि सो शुल्क तिर्नुपर्छ। यद्यपि, नेपाल सरकारले चिनियाँ नागरिकहरूलाई पर्यटक भिसा वर्षमा १५० दिनसम्म निःशुल्क प्रदान गर्दै आएको छ। निषेधित क्षेत्र प्रवेश शुल्क महँगो भएको भन्दै हाल उक्त दर पुनरावलोकनको लागि सरकारी तथा सरोकारवाला निकायबीच छलफल भइरहेको छ।
चीनतर्फको कोरला नाकामा आधुनिक पूर्वाधारसहित अध्यागमन, भन्सार, क्वारेन्टाइन र सुरक्षा कार्यालय सञ्चालनमा छन्। नेपालतर्फ भने हाल केवल अध्यागमन कार्यालय मात्र रहेको छ। भन्सार, क्वारेन्टाइन र सुरक्षा निकायका कार्यालयहरू करिब १५ किलोमिटर टाढा नेचुङमा रहेको हुँदा एकीकृत सेवा प्रवाहमा कठिनाइ आइरहेको बताइन्छ।
You must be logged in to post a comment.