विदेशी विद्यार्थीको भिसा दुरुपयोग:पैसा कमाउने प्रवृत्ति बढ्दो

अध्यागमन विभागले नेपालका शैक्षिक संस्थाहरूलाई विदेशी नागरिकहरूलाई अध्ययनका लागि भर्ना गर्दा कडा सावधानी अपनाउन निर्देशन दिएको छ। विभागले विदेशी विद्यार्थीहरूलाई उच्च शिक्षा र नेपालको भाषा, संस्कृति, कला, साहित्य तथा संगीत लगायतका विधामा अध्ययनका लागि प्रोत्साहन र सहजीकरण गर्दै आएको भए पनि कतिपय संस्थाहरूले केवल आम्दानीका लागि भर्ना गर्दै आएको पाइएको छ।

विभागको अनुगमन अनुसार केही शैक्षिक संस्थाहरूले नियमित रूपमा कक्षामा सहभागी नभएका विद्यार्थीहरूलाई पनि अध्ययन भिसा सिफारिस गरेको, नक्कली कागजात पेश गरी भिसा अवधि लम्ब्याएको, अध्ययन पूरा भएपछि प्रमाणपत्र प्रदान नगरेको तथा गैरकानूनी क्रियाकलापमा संलग्न विदेशी विद्यार्थीलाई समेत भिसा दिएको भेटिएको छ।

त्यसैले, अध्यागमन विभागले सबै शैक्षिक संस्थालाई आफ्ना विद्यार्थीहरू नियमित पठनपाठनमा संलग्न छन् कि छैनन् भन्ने सुनिश्चित गरी मात्र भिसा सिफारिस गर्न, र कुनै शंकास्पद गतिविधि देखिएमा तुरुन्तै स्थानीय प्रशासन वा अध्यागमन विभागलाई जानकारी दिन निर्देशन दिएको छ।