सामाजिक सुरक्षा कोषले सार्वजनिक गरेको तथ्यांक अनुसार वैदेशिक रोजगारीमा रहेका नेपाली श्रमिकहरू नै योगदानकर्तामध्ये सर्वाधिक (७५% भन्दा बढी) भएका छन्। आर्थिक वर्ष २०८१/८२ सम्म कुल २३ लाख ७४ हजार ४८६ श्रमिक कोषमा आवद्ध छन्, जसमा १७ लाख ७१ हजार ५३७ जना वैदेशिक क्षेत्रका श्रमिक रहेका छन्।
सामाजिक सुरक्षा कोषका अनुसार वैदेशिक रोजगारमा रहेका श्रमिकहरूबाट रु २५ अर्ब ३६ करोड योगदान रकम यस आ.व. मा संकलन गरिएको छ, जसले कुल संकलनलाई रु ८३ अर्ब ६५ करोड मा पुर्याएको छ।
वैदेशिक क्षेत्रमा कार्यरत श्रमिकहरूले स्वास्थ्य उपचार, वृद्ध अवस्था, अशक्तता तथा परिवार सुरक्षा योजनामा पनि व्यापक रूपमा दाबी भुक्तानी पाएका छन्।
दाबी भुक्तानी र सापटी वितरणमा विदेशबाट योगदानकर्ताको हिस्सा
- स्वास्थ्य तथा मातृत्व सुरक्षा योजना अन्तर्गत: १ लाख १० हजार भन्दा बढी श्रमिकले रु २ अर्ब १५ करोड भुक्तानी प्राप्त
- वृद्ध अवस्था योजना अन्तर्गत: १ लाख १२ हजार ८ सय ६८ जनालाई रु १३ अर्ब १३ करोड वितरण
- विशेष र घर सापटी: ३४ हजारभन्दा बढी श्रमिकलाई रु ७ अर्ब ४ करोड सापटी वितरण
विदेशमा कार्यरत श्रमिकका लागि पहुँच विस्तार
वैदेशिक रोजगारमा रहेका श्रमिकहरूले सजिलै नेपालबाटै वा विदेशमा बसेरै योगदान गर्न सकुन् भनेर कोषले १२ वटा वित्तीय संस्थासँग सहकार्य गरिसकेको छ। साथै, विदेशबाट अनलाइन माध्यमबाट सेवा लिन सक्ने प्रणाली समेत विस्तार भइरहेको कोषले जनाएको छ।
अब परिवारसहित स्वास्थ्य सुरक्षाको ग्यारेन्टी
अब सामाजिक सुरक्षा कोषले श्रमिक मात्र होइन, तिनका परिवार सदस्यहरूलाई पनि स्वास्थ्य बीमा जस्तै सेवा दिने व्यवस्था कार्यान्वयनमा ल्याएको छ। अस्पतालमा भर्ना भई उपचार भएमा १० लाखसम्मको खर्चमा ५०% सहभुक्तानी कोषबाट पाइनेछ।
