संयुक्त अरब इमिरेट्स (युएई) ले भ्रमण भिसासम्बन्धी नयाँ नियम लागू गरेको छ, जसअनुसार अब आफन्त, परिवार वा साथीलाई भ्रमण भिसामा बोलाउन स्पोन्सरको आम्दानी निश्चित स्तरमा हुनुपर्नेछ। नयाँ प्रावधानले स्पोन्सरको मासिक आय कम्तीमा ४,००० देखि १५,००० दिरामसम्म हुनुपर्ने व्यवस्था गरेको छ।
यस अन्तर्गत, भ्रमण भिसा पाउनका लागि स्पोन्सरको आम्दानी स्रोत पारदर्शी हुनुपर्नेछ र तोकिएको न्यूनतम तलब पूरा गर्न सक्ने व्यक्तिले मात्र आफन्त वा साथीलाई युएई लैजान सक्नेछन्। नियमअनुसार स्पोन्सरका सम्बन्धका आधारमा चार तहमा तलबको दर तोकिएको छ।
पहिलो तहमा पर्ने बुबाआमा, श्रीमान्–श्रीमती र छोराछोरीका लागि मासिक कम्तीमा ४,००० दिराम आम्दानी चाहिनेछ। दोस्रो तहमा दाजुभाइ, दिदीबहिनी, हजुरबा–हजुरआमा र नातिनातिनी पर्छन्, जसका लागि ८,००० दिराम तलब चाहिनेछ। तेस्रो तहमा पर्ने काका–काकी, मामा–माइला, फुपू र कजिनलाई भ्रमण भिसा दिलाउन पनि स्पोन्सरको आम्दानी ८,००० दिराम हुनुपर्नेछ।
नातेदारबाहेक साथी वा अन्य परिचितलाई भ्रमण भिसामा बोलाउन भने १५,००० दिरामको मासिक तलब आवश्यक हुनेछ।
यो नीति युएईको सङ्घीय पहिचान, नागरिकता, भन्सार तथा बन्दरगाह सुरक्षा प्राधिकरण (ICP) द्वारा लागू गरिएको हो। नयाँ व्यवस्थाअनुसार भ्रमण भिसा आवेदन दिन नाता प्रमाणित कागजात, कम्तीमा ६ महिना बाँकी रहेको राहदानी र फर्किने टिकट पेस गर्नुपर्नेछ।
